Tag: Sindaco di Udine

Udin, ai 3 di Dicembar dal 2019

Preseât siôr sindic,
Timp indaûr mi jere someât di sintî che il comun di Udin al veve intenzion di fâ bon il Plan Gjenerâl di politiche linguistiche daûr di ce che al è previodût dal articul 27 de L. R. 29/2007 (“Normis pe tutele, valorizazion e promozion de lenghe furlane”), cun ogni evidence o ai sintût mâl e interpretât ancjemò piês. La indiference intai confronts de lenghe furlane e di une politiche linguistiche coerente par fâle cressi e risulte, de bande di cheste aministrazion, palese intune maniere scandalose. Un assum che al varès invezit di jessi sintût tant che fondamentâl par une classe politiche che e ves vût a cûr no dome  la nestre identitât ma, e di consecuence, la esistence stesse de realtât furlane.

In precedentis ocasions i vevi za vût segnalât (cence par altri vê rispueste) cemût che, sul teritori comunâl de citât li che o vîf, cartei stradâi gnûfs e tabelis resintis, a ledin indenant a jessi dutis e dome par talian, e li che adiriture si pues constatâ la disparizion di tabelis bilengâls, taponadis (par vergogne?) cun sfueis plastificâts scrits di plante fûr e ancje chei dome par talian. Cumò o viôt che cheste pratiche e va indenant.

Di fat, in ocasion de “grande rivoluzion des scovacis” che e je daûr a mobilitâ dute la citât, no si è pensât nancje par un moment di meti lis scritis sui bidons, dongje dal talian, ancje par furlan. Stesse robe sul materiâl informatîf che al compagne chest servizi. Stant che si trate di un servizi public e che al ven paiât di ducj i citadins, une obiezion dal gjenar mi somee plui che pertinente.

Al è clâr che, viodudis lis precedentis esperiencis e la atenzion che al à simpri vût intal furnî un cualchi sclariment in proposit, ancje cheste volte no mi spieti nuie di lui. Mi interessave dome di fâjal savê e di fâlu savê ator.

Mandi
Fabian Ros